Ангилал: Шүлэг
Хүй цөглөсөн бууцны халуун илчээсХөхөл даахитай үрсийн гэгээн инээдээс
Мэргэдийн мэлмийд цэцэлсэн анир амгалангаас
Мэндийн чавхдасанд хөглөгдсөн утга уянгаас
Бид итгэл авч яг л модод шиг ургана
Онгод хурайлан омогших ариун сургаалаас
Орчлонг аргадан залбирах сүүн цацлаас
Ухаан нь хотолсон мэргэдийн билиг ерөөлөөс
Уулс нь бөхөлзөн өндөлзөх нутгийн тэнхээнээс
Бид адис авч яг л хүлэг морь шиг хурдална
Нярайлж нялхрах хорвоогийн алтан хормойноос
Нягтарч дотогшлох бодлын хөлчүү хэлхээнээс
Урсан мяралзах цагийн давчуу хүрдээс
Уянгалан бүүвэйлэх ертөнцийн торгон эгшгээс
Бид эх авч яг л тэнгис шиг давалгаална
Сэмэрч хөврөх нэхээстэй дурдатгал дурсамжаас
Салхи хөгжөөж цалгилах үнэний хязгаараас
Элст нугад хоргодсон хөхөлбий гунигаас
Эсгий үүдээр шагайх мөнгөн туйлаадсаас
Бид тайтгарал авч яг л бодол шиг гэгээрнэ
Б.Бүжинлхам 2014-04-19