Ангилал: өгүүллэг

Түмэн од мичид гялалзах шөнийн тэнгэрт үзэсгэлэнт саран авхай заларна. Толь шиг мэлтэлзэх нуурын толионд тольдон, инээмсэглэж байхыг нь харсан нэгэн хүн их дуугаар –Үүрд  гуниглаж суудаг, аз жаргалгүй сар чи хүмүүс бидэнд үргэлж атаархдаг байх. Яахав, чамайг үзэсгэлэн гоо бүсгүй болоод газар дэлхий дээр бууж ирвэл авгайгаа болгож авъя гэж тохуурхон орилжээ.  

Хариуд нь -Орчлон ертөнцийн сайхан бүхнийг харж баясдаг болохлоор би хамгийн аз жаргалтай. Алтан дэлхийн хүмүүст итгэл найдварын гэрэл гэгээг хэнээс ч харамлахгүй, адилхан бэлэглэдэг учраас өчүүхэн ч ганцаардаж гунигладаггүй юм. Харанхуй бүдүүлэг, мунхаг хүн чиний дэргэд гуньж гутарч амьдарснаас  тэнгэр эцгийнхээ ивээлд жаргаж, хөх тэнгэрийн орноо хүсэл мөрөөдөл шиг гялалзах оддын дунд заларч явах нь хавьгүй дээр биз дээ гэж үзэсгэлэнт саран авхай хариулжээ.

                                               2014 оны 4 дүгээр сар 11 Б.Бүжинлхам